من الحياة
ابتسام ابوطاهر
الاستوري ما ميدان معركة
يا جماعة الخير سلام عليكم
الزمن ده بقى الواحد يفتح الواتساب ولا الفيس ولا الانستا، أول حاجة تقابلو الاستوري بتاعت الناس. المفروض الاستوري دي نافذة صغيرة توريك حال الزول وتبشرك بي كلام يشرح الصدر ويقويك ليومك.
لكن الحاصل شنو؟
بقينا نشوف استوريات كلها مطاعنات ومغارز وكلام مدسوس. فلانة تقصد فلانة، وفلان يرد لي فلان بكلام فيهو تجريح، والناس واقفة تتفرج وتعمل سكرين شوت وتزيد النار حطب.
والله يا جماعة ده غلط كبير.
الاستوري ما معمولة عشان نطلع فيها حساباتنا مع بعض، ولا عشان نجرح زول من ورا ضهرو. الكلام ده بيكبر الشينة، بيزرع الضغينة، وبيخلي القلوب تشيل من بعض. وانت ممكن تكون قاصد زول معين، لكن الكلام يجرح عشرة أبرياء معاك.
ربنا قال: “وقولوا للناس حسنا”
والنبي ﷺ قال: “الكلمة الطيبة صدقة”
يعني حتى لو مضايق، حتى لو عندك حق، مكانك ما الاستوري.
لو عايز تعاتب زول عاتبو بينك وبينو، ولا فوتو لربك. لكن تخت كلام مسموم قدام خلق الله كلهم، ده ما رجالة وما أخلاق.
خلونا نرجع للأساس:
الاستوري دي خليها صدقة جارية ليك.
- آية تريح قلب زول
- حديث يذكر الناس بربهم
- كلمة طيبة، دعوة حلوة، نصيحة خفيفة
- حاجة مضحكة تفتح النفس من غير ما تجرح زول
- صورة من طبيعة ربنا تذكرك بالنعمة
صدقني الكلام السمح البتختو الليلة، بكرة تلقى زول يقول ليك “والله استوريتك ديك قامت بي نفسي”. أما المطاعنات، بتروح وبتخلي ليك ذنب وعداوة ساي.
نخلي استورياتنا مراية لنفوسنا الطيبة، ما ساحة حرب.
الدنيا ما مستاهلة، والقلوب تعبت من الكلام الجارح.
ربنا يصلح حالنا وحالكم، ويجعل كلامنا كلو خير.
